17 იანვარს მილანის მოდის კვირეული დაიწყო, სადაც ისეთმა ცნობილმა მოდის სახლებმა, როგორებიცაა Dolce & Gabbana, Prada და Emporio Armani მამაკაცის ხაზის შემოდგომა / ზამთრის კოლექციები წარადგინეს.
Photo: Courtesy of Prada
Dolce & Gabbana-ს ჩვენებამ, რომელიც უამრავი პაპარაცის თანხლებით გაიმართა აშკარად დაგვანახა გასული საუკუნეების ნოსტალგიური განწყობა და ძველი ჰოლივუდური სტილის გაცოცხლება. კოლექციის ძირითადი ნაწილი მასიური ბეწვის მოსაცმელებით და ლეოპარდის პრინტით შეიქმნა, რამაც კიდევ ერთხელ დაამტკიცა, რომ მიმდინარე წლის მთავარი ტრენდი, სწორედ ბეწვის დეტალებით გაფორმებული ტანისამოსია.
Photo: Vogue Italia / 10Magazine
ბეწვის აქტუალურობას გაუსვა ხაზი Prada-ს უახლესმა კოლექციამაც. დიზაინერების მკაფიო აქცენტი იგრძნობოდა ტრენდული მასალისგან შექმნილ სამოსზე. “კრეატიულობა ზედმეტი ფიქრის გარეშე” პრადას უახლესი კოლექციის ფუნდამენტურ ღირებულებად იქცა. კოლექციის მთავარი სათქმელი გამოიხატებოდა იმაში, რომ მოდა მხოლოდ ესთეტიკის ელემენტი არ არის და ის ადამიანური ბუნების შთამაგონებელი ძალაა, რომელიც ჰუმანურ გრძნობებს და წინააღმდეგობებს გამოხატავს. „ ეს გარკვეულწილად პასუხია იმაზე, რაც ახლა ხდება. ჩვენ ყველა მოვლენას უნდა ვუპასუხოთ ინსტინქტით, ჰუმანურობით, ვნებითა და რომანტიზმით “- განაცხადა მიუჩია პრადამ კულისებში.
Photo: Filippo Fior/ Gorunway.com / Vogue Runway
იტალიელმა დიზინერმა ჯორჯო არმანმა Emporio Armani-ს მამაკაცის ხაზის კოლექციაში კიდევ ერთხელ დაამტკიცა რომ მან ყველზე უკეთ იცის, როგორ მოიზიდოს ახალგაზრდა მოდის მოყვარულები. კოლექცია ორ ნაწილად დაიყო. ჩვენება ქარის ხმის ფონზე გაიხსნა, რაც ზამთრის ცივი ამინდების ასოციაციას ქმნიდა, სათხილამურო და მთამსვლელთა ტანისამოსიც სეზონის შესაბამის განწყობას აფრქვევდა. ჩვენების მეორე ნაწილი უფრო კლასიკურ და ელეგანტურ სტილს მიეძღვნა, ტყავის პალტოები, ქამრიანი თრენჩები და ბეწვის დეტალები კოლექციის მთავარ დეტალებს წარმოადგენდა. მრავალფეროვანი ტექსტურებით შექმნილი ელეგანტური კოლექცია იისფერის, ვარდისფერის, ზეთისხილისა და ყავისფერის გარშემო ტრიალებდა.
Photo: Daniele Oberrauch / Gorunway.com / Vogue Runway
ტექსტი: მარიამ ბექაური
