ელენე ძიძიშვილი: მილანური მოდა, ახალი შესაძლებლობები და მოდის ინდუსტრიაში საკუთარი ადგილის ძიება

მოდის სამყაროსკენ გადადგმული პირველი ნაბიჯები
ელენე ძიძიშვილი მოდის სტუდენტია, რომელიც უკვე სამი წელია მილანში ცხოვრობს და აქტიურად ეუფლება ამ ინდუსტრიას. მოდის მიმართ მისი ინტერესი ბავშვობიდან იღებს სათავეს, როცა დედის არჩეული ტანსაცმლის ნაცვლად საკუთარი სტილის შექმნა დაიწყო. „ყოველთვის მინდოდა, რომ ჩემი ტანსაცმელი ჩემივე ხასიათსა და განწყობას გამოხატავდეს“, — ამბობს ელენე. საბოლოოდ, ეს ყველაფერი მის კარიერულ გადაწყვეტილებაში გადაიზარდა.

მილანში განათლება და კარიერული გზა
17 წლის ასაკში ელენემ გადაწყვიტა, რომ მოდის სფეროში საერთაშორისო განათლება მიეღო. პარიზსა და მილანს შორის არჩევანი საბოლოოდ იტალიის სასარგებლოდ გააკეთა და IED (Istituto Europeo di Design)-ში ჩააბარა Fashion Styling & Communication-ის სპეციალობაზე. „მილანი მოდის დედაქალაქია. აქ ქუჩაში გასვლაც კი შთაგონებად იქცევა. თითოეული ადამიანი რაღაც განსაკუთრებულს ქმნის“, — აღნიშნავს ის.

მილანის მოდის კვირეულის გამოცდილება
მოდის კვირეულზე დასწრება ელენეს დიდი ხნის მიზანი იყო. დასაწყისში ის ფოტოგრაფებთან თანამშრომლობდა ქუჩის სტილის მიმართულებით, მოგვიანებით კი მოწვევებიც მიიღო. „საინტერესოა, როგორ იქმნება ეს მასშტაბური ღონისძიება კულისებში. ყველაფერი წამებში უნდა იყოს მზად და არანაირი შეცდომისთვის ადგილი არ რჩება“, — გვიყვება ელენე.

კულისებს მიღმა: მოდის ინდუსტრიის რეალური მხარე
მოდის კვირეულის კულისებში მუშაობამ ელენეს ინდუსტრიის რეალური სირთულეები და ემოციები დაანახვა. „შოუს დაწყებამდე უკან სრული ქაოსია: მოდელების მზადება, სტილისტების სწრაფი რეაქციები… მაგრამ ამ პროცესს თავისი განსაკუთრებული ენერგია აქვს“, — ამბობს ის.

შემთხვევითი შეხვედრა ნაომი ქემბელთან
მილანში ცხოვრებისას ელენემ არაერთ ცნობილ ადამიანს გადააწყდა, თუმცა ყველაზე დასამახსოვრებელი ნაომი ქემბელთან შეხვედრა იყო. „ერთ საღამოს, ქუჩაში გასეირნებისას, ნაომი ქემბელი შემთხვევით დავინახე. მინდოდა, მივსულიყავი და დავლაპარაკებოდი, მაგრამ მივხვდი, რომ ზოგჯერ სჯობს, უბრალოდ დააკვირდე და აღფრთოვანდე“, — იხსენებს ის.

2025 წლის შემოდგომა/ზამთრის კოლექციების ანალიზი
ელენეს თქმით, წლევანდელი მილანის მოდის კვირეული მრავალფეროვნებით გამოირჩეოდა. „Dsquared2-ის შოუ საოცარი იყო! სცენის დიზაინი და ატმოსფერო დაუვიწყარი აღმოჩნდა. Gucci, Prada, Cavalli… ყველა ბრენდმა თავის ხასიათი მკაფიოდ წარმოაჩინა“, — გვიყვება ელენე.

მომავალი და მიზნები
ელენეს მთავარი მიზანი Saint Laurent-ის მოდის სახლში მუშაობაა. „ეს ბრენდი ჩემთვის ელეგანტურობისა და მეამბოხე სულისკვეთების იდეალური კომბინაციაა. მჯერა, რომ თუ ყოველდღე იმაზე იმუშავებ, რაც გიყვარს, აუცილებლად მიაღწევ წარმატებას“, — აღნიშნავს ის.

ინტერვიუ: მარიამ ბექაური