ყველა ბრენდს თავის ისტორია აქვს, თუმცა არსებობენ უკვდავი ბრენდები, თავისი განსაკუთრებული ისტორიებით, ამის ყველაზე თვალსაჩინო მაგალითია- შანელი. ჯერ კიდევ მე-20 საუკუნის დასაწყისში, ახლად გამოჩენილმა ბრენდმა ნამდვილი ფურორი მოახდინა საზოგადოებაში, მისი დამაარსებელი, გაბრიელ ბონეერ (კოკო) შანელი კი თამამად შეგვიძლია მივიჩნიოთ მოდის ერთ-ერთ რევოლუციონერად, რომელმაც მოარღვია მკაფიო საზღვრები მამაკაცის და ქალის სტილს შორის. შანელის წარმატებაზე ასევე თავდაუზოგავად იშრომეს მომდევნო კრეატიული დირექტორებმა: კარლ ლაგერფელდმა, რომელმაც ბრენდს თითქოს თავიდან აჩუქა სიცოცხლე და ვირჯინია ვიარდიმ, რომელმაც ღირსეულად გააგრძელა ლაგერფელდის გზა. თუმცა 2024 წლის ივნისში, ვირჯინიამ შანელთან ხელშეკრულება მოულოდნელად შეწყვიტა და ბრენდი კრეატიული დირექტორის გარეშე დარჩა, რამაც საზოგადოების განსაკუთრებული ყურადღება მიიქცია, შანელის ბოლო ჩვენებები კი, რომელსაც კრეატიული გუნდი ხელმძღვანელობდა მოდის ექსპერტების, კრიტიკოსების თუ მედიის მიკროსკოპში მოექცა.
Photo: Frank Perrin
მიუხედავად სკეპტიკური განწყობებისა და ეჭვებისა შანელის კრეატიულმა გუნდმა მოახერხა ყველა გამოწვევასთან გამკლავება, ეს კი ყველაზე თვალსაჩინოდ აისახა შანელის 2024/25 წლის Métiers d’art კოლექციის პრეზენტაციაზე, რომელიც ჩინეთში, ხანგჭოუს დასავლეთის ტბაზე გაიმართა. აღნიშნულმა კოლექციამ ტრადიციულობის და თანამედროვე ესთეტიკის თვალსაჩინო სინთეზი შექმნა. ელეგანტური სამოსი, შანელისთვის დომინანტური ფერთა პალიტრები, ბრენდის ტრადიციული ქსოვილები და ელემენტები შანელის ესთეტიკას ზუსტად ერგებოდა. აქვე ხაზგასასმელია ის ფაქტი, რომ კოლექციაზე იმუშავეს, როგორც შანელის გუნდის წევრებმა, ასევე ჩინეთის ადგილობრივმა ოსტატებმა, რომლებმაც ტრადიციული ტექნიკით შექმნილი ჩინური აბრეშუმი თანამედროვე ფორმებს მოარგეს, ერთობლივმა მუშაობამ და ენთუზიაზმმა კი ნამდვილად დაუვიწყარი კოლექცია და სანახაობა შექმნა.
Photo: chanelofficial
Photo: chanelofficial
Photo: chanelofficial
გარდა ჯადოსნური კოლექციისა და სანახაობისა, ხანგჭოუს ტბაზე გამართული ჩვენება ყურადღების ცენტრში მოექცა მიწვეული სტუმრების სიითაც, რომელთა შორისაც იყვნენ: ლუპიტა ნიონგ’ო, რებეკა არმსტრონგი, კაროლინ დე მაიგრესი, ლუსი ბოინტონი და სხვები. გამორჩეულმა სტუმრებმა კიდევ ერთხელ გაუსვეს ხაზი იმ ფაქტს, რომ შანელი კვლავ არ თმობს ერთ-ერთ მოწინავე პოზიციას
მოდის სფეროში, მიუხედავად იმისა, რომ ამჟამად ბრენდი კრეატიული დირექტორის გარეშეა დარჩენილი.
Photo: chanelofficial
Photo: chanelofficial
Photo: chanelofficial
სუბიექტური თვალსაზრისით, აღნიშნული ჩვენება კიდევ უფრო გამორჩეული იყო ქართველი მაყურებლისთვის, რადგან მოდელთა შორის იყო ყველასთვის საყვარელი მატილდა გვარლიანი. შანელის ბოლო ჩვენებამდე მატილდა ასევე მონაწილეობდა ბრენდის 2023 წლის გაზაფხული/ზაფხულის კოლექციის პრეზენტაციაზე და სუნამო “CHANCE”-ის სარეკლამო კამპანიაში.
Photo: azyaamode
მიუხედავად იმის, რომ ბრენდის კრეატიული ჯგუფი არაჩვეულებრივად უმკლავდებოდა ყველა გამოწვევას საზოგადოება მაინც განსაკუთრებულად ელოდა მომდევნო კრეატიული დირექტორის წარდგენას, არსებობდა ვარაუდები და კანდიდატები, რომლებიც აქტიურ განხილვაში იყვნენ . მაგალითად, ამერიკელი დიზაინერმა მარკ ჯეიკობსი, რომელმაც თავად გამოთქვა სურვილი შანელის კრეატიული დირექტორის პოსტისთვის, ჯეიკობსთან ერთად საზოგადოება აქტიურად განიხილავდა დიზაინერებს: სარა ბარტონს, ჯონ გალიანოს და სიმონ პორტე ჟაკმუსს, თუმცა ამ უკანასკნელმა BOF-ის ბოლო ინტერვიუში აღნიშნა, რომ მისი გადატვირთული გრაფიკი და საკუთარ ბრენდზე მუშაობის პროცესი შანელის კრეატიული დირექტორის პოსტის განხილვის საშუალებას არ აძლევდა. საბოლოოდ და ბევრი ადამიანისთვის მოულოდნელად, ბრენდმა კრეატიულ დირექტორად მეთიუ ბლაზი დაასახელა, რომელიც ამ პოსტისთვის Bottega Veneta-ს დაემშვიდობა, სადაც ის კრეატიული დირექტორის პოსტს 2021 წლიდან იკავებდა. ჩვენ კი ვფიქრობთ, რომ მეთიუს ინოვაციური ხედვები საინტერესო ჭრილში დაგვანახებს შანელს, ამიტომ მოუთმენლად ველით ბრენდის განვითარების ახალ ეტაპს.
Photo: Matthieu Blazy (Instagram)
ტექსტი: მარიამ ბექაური
