ალბათ, უამრავი თქვენგანი ამჩნევს როგორ იცვლება ფრჩხილების ტენდეციები წლიდან წლამდე და სეზონიდან სეზონამდე. თუ 2024 წელს გავიხსენებთ, აღმოვაჩენთ რომ მთავარი ტრენდი ქრომირებული მანიკური იყო, რომელიც 2025 წელსაც არ კარგავს პოპულარობას. თუმცა, საინტერესოა ფრჩხილის რომელი ფერები და ფორმებია ყველაზე აქტუალური 2025 წლის ზაფხულში? თუ ჯერ კიდევ არ გადაგიწყვეტიათ, როგორი უნდა იყოს თქვენი შემდეგი მანიკური, აუცილებლად გამოგვყევით სტატიის ბოლომდე, სადაც სეზონის მთავარ ტრენდებს აღმოაჩენთ.
პასტელური ყვითელი:
ალბათ არავის გაუკვირდება, რომ ჩამონათვალს სწორედ ამ ფერით ვიწყებთ. ისევე როგორც ტანსაცმელში და აქსესუარებში, კარაქისფერი ყვითელი წელს ფრჩხილებზეც ძალიან ტრენდულია. ყვითლის ეს ნათელი და ნაზი ტონი იდეალურად ერწყმის ზაფხულის განწყობას, სანაპიროს ატმოსფეროს და გარუჯულ სხეულს, ამიტომ თუ თქვენი შვებულება ზღვისპირა კურორტებზეა დაგეგმილი, კარაქისფერი ყვითელი საუკეთესო არჩევანი იქნება.
ლურჯი და ცისფერი ტონები:
2000-იანი წლების ნოსტალგიით შთაგონებული ტონები, რომელიც გამორჩეულად უხდება თეთრ სამოსს. თუ თქვენი ზაფხულის გარდერობში თეთრი ჭარბობს, არჩევანი აუცილებლად უნდა შეაჩეროთ ცისფერ და ლურჯ ტონებზე.
შოკოლადისფერი:
იმ შემთხვევაშ თუ ფერად ექსპერიმენტებს თავს არიდებთ და უპირატესობას ნეიტრალურ ტონებს ანიჭებთ, მაშინ შოკოლადისფერი სწორედ თქვენთვისაა. ექსპერტების პროგნოზით, ეს ფერი არა მხოლოდ ზაფხულში, არამედ შემოდგომასა და ზამთარშიც დიდი პოპულარობით ისარგებლებს.
მინიმალისტური ტონები:
მინიმალიზმის მოყვარულებისთვისაც გვაქვს სასიხარულო ამბავი, მიმდინარე სეზონზე ძალიან ტრენდულია ნაზი, თითქმის შეუმჩნეველი ტონები, რომელიც იდეალურად ერწყმის ფრჩხილის ბუნებრივ ფერს.
ღია წითელი:
ალბათ არ გაგიკვირდებათ ჩვენს ჩამონათვალში წითელი ფერის არსებობა, რადგან წითელი ფრჩხილები მარადიული კლასიკაა, რომელიც არასდროს კარგავს აქტუალობას. ამ სეზონზე კი განსაკუთრებული პოპულარობით სარგებლობს ღია წითელი ტონები, რომელიც გამორჩეულად უხდება ზაფხულს.
ფრანგული მანიკური:
წითელთან ერთად კვლავ აქტუალურია “ფრენჩი” და აქ საუბარი გვაქვს, როგორც კლასიკურ, ასევე ფერად ფრანგულ მანიკურზე.
ფრჩხილის ფორმა:
რაც შეეხება ფრჩხილების ფორმას, აღსანიშნავია რომ მიმდინარე სეზონზე მოკლე ნუშის ფორმის ფრჩხილები განსაკუთრებით ტრენდულია, თუმცა თუ უპირატესობას გრძელ ფრჩხილს ანიჭებთ, ამ შემთხვევაში იდეალური ოთხკუთხედი ფორმა იქნება.
