ლოს ანჯელესმა კიდევ ერთხელ უმასპინძლა მუსიკის სამყაროს ყველაზე მნიშვნელოვან დაჯილდოებას, Grammy-ს.
ყველასთვის საყვარელი ვარსკვლავები წითელ ხალიჩაზე და მთავარ სცენაზე ვიხილეთ. როგორც მოსალოდნელი იყო, ჩვენი დროის ერთ-ერთი ყველაზე წარმატებული ვარსკვლავის ტეილორ სვიფტის მორიგი ტრიუმფი ვნახეთ. ტეილორმა მორიგი გრემი მიიღო წლის ალბომის კატეგორიაში. აღსანიშნავია, რომ ტეილორმა ეს ჯილდო კარიერაში მეოთხედ მიიღო და გახდა პირველი ვარსკვლავი, რომელმაც ამ შედეგს მიაღწია.
კარიერაში პირველი გრემი მიიღო მაილი საირუსმა. მაილის ეს ჯილდო გადაეცა კატეგორიაში, წლის ჩანაწერი სიმღერისთვის – Flowers.
აღსანიშნავია სელინ დიონის გამოჩენა. ლეგენდარული მომღერლის შესახებ დიდი ხანია მედია წერს, რომ მას უკურნებელი დაავადება აქვს, რომელიც კუნთების ტკივილთანაა დაკავშირებული. ბოლო ცნობების მიხედვით, სელინს დამოუკიდებლად გადაადგილება უჭირდა, თუმც როგორც ცერემონიიდან გავრცელებულ ფოტო და ვიდეო მასალაში ვხედავთ, სელინი საბედნიეროდ, მშვენიერ ფორმაშია.
ერთ-ერთი საინტერესო მომენტი იყო წითელ ხალიჩაზე ლანა დელ რეის გამოჩენა. ლანა და ტეილორ სვიფტი კამერების წინ ერთად პოზირებდნენ. ასევე აღსანიშნავია გრემის სცენაზე ბიონსესა და ჯეი ზი-ს 12 წლის გოგონას, Blue Ivy Carter-ის დებიუტი.
მაილი საირუსი მედიის განსაკუთრებული ყურადღების ქვეშ მოექცა არა მხოლოდ წითელ ხალიჩაზე Schiaparelli-ს ბადისებრი ოქროსფერი კაბით, არამედ თავისი სასცენო იმიჯით და პერფორმანსით. მაილის ლეგენდარული დიზაინერის ბობ მაკის მიერ შექმნილი რეტროს სტილის კაბა ეცვა – ამ სამოსით, მოძრაობებითა და ვარცხნილობით მაილიმ ყველას ტინა ტერნერი გაგვახსენა.
