მამაკაცის სამოსის მოდის კვირეული დასრულდა და პარიზში ოტ კუტიურის კვირეული დაიწყო. ალბათ არავისთვის იქნება გასაოცარი ის ფაქტი, რომ პარიზის მაღალი მოდის კვირეული ტრადიციულად Schiaparelli-ის ჩვენებით გაიხსნა. ბრენდის კრეტიულმა დირექტორმა, დანიელ როუზბერმა ჯერ კიდევ Schiaparelli-სთან თანამშრომლობის დასაწყისში განაცხადა, რომ ელზა სკიაპარელის მემკვიდრეობის გაგრძელებას აპირებდა, რომელიც ალბათ ყველაზე მეტად გრძნობდა ხელოვნებას მოდაში. 2019 წლიდან როუზბერმა ბრენდს ახალი სიცოცხლე აჩუქა და ღირსეულად გააგრძელა ელზას მემკვიდრეობა.
დანიელ როუზბერის კოლექციის ჩვენებას მოდის მოყვარულები წელსაც განსაკუთრებული ენთუზიაზმით ელოდნენ, რომელსაც დიზაინერი სწორედ იმ მოწოდების სიმაღლით შეხვდა, როგორც ეს ელზას დროინდელ Schiaparelli-ს შეეფერება.
ჩვენებაზე საზოგადოების განსაკუთრებული ყურადღება მიიქცია ამერიკელი სუპერ მოდელების კენდალ ჯენერის და ალექს კონსანის გამოჩენამ. სტუმრის ამპლუაში მოგვევლინენ ყველასთვის ცნობილი მოდელები: კარლა ბრუნი, ფარიდა ხელფა,ნატალია ვადიანოვა.
უახლეს კოლექციაში კვლავინდებურად იგრძნობოდა სიურეალიზმის გავლენა, რომელიც სკიაპარელის განუყოფელი ნაწილია. როუზბერის შემოქმედებამ მკაფიოდ აჩვენა ბრენდის მემკვიდრეობის მნიშვნელობა, რომელიც შერწყმულია თანამედროვე ესთეტიკასთან. კოლექციის ფერთა პალიტრა მოიცავდა: თეთრის, ოქროსფერის, შოკოლადისფერის, კრემისფერის და შავი-ის უნიკალურ კომბინაციებს. სამოსში გამოყენებული უმაღლესი ხარისხის ქსოვილები კიდევ ერთხელ უსვამდა ხაზს მაღალ მოდაში Schiaparelli-ის ერთ-ერთ მოწინავე პოზიციას. კოლექციაში წარმოდგენილი აქსესუარები დამახასიათებელი ბრწყინვალებით და უნიკალურობით გამოირჩეოდა, რომელიც კიდევ უფრო მკაფიო კავშირს აჩვენებდა სიურეალიზმთან. განსაკუთრებული ყურადღების ქვეშ მოექცა სამოსის სილუეტები, რომელიც სხეულის ფორმებს თვალისმომჭრელ სილამაზეს ანიჭებდა: ფართო მხრები, წელის ვიწრო დეტალები, გამჭვირვალე ქსოვილები და ასიმეტრიული ელემენტები.
დანიელ როუზბერის ახალმა კოლექციამ კიდევ ერთხელ დაგვანახა ხელოვნების გავლენა მოდაზე, სიურეალისტური მემკვიდრეობის და თანამედროვე ინტერპრეტაციების მკაფიო კოლაბორაციამ კი კიდევ ერთხელ დაამტკიცა, რომ Schiaparelli მოდის სამყაროში ნოვატორია, რომელიც არასდროს უშინდება ჩარჩოების დამსხვრევას და საზღვრების გადალახვას.
ტექსტი: მარიამ ბექაური
