დიზაინი გაცილებით მეტია, ვიდრე უბრალოდ ლამაზი ნივთების ერთობლიობა – ეს არის ხელოვნება, ბიზნესი და ფსიქოლოგია, რომელიც ჩვენს ყოველდღიურობას აყალიბებს. იმისთვის, რომ ჩავწვდეთ მოდის სამყაროს სიღრმეებს, ან შევქმნათ ჰარმონიული გარემო ჩვენს ირგვლივ, ხშირად მხოლოდ ინტუიცია არ კმარა. ამ სტატიაში წარმოგიდგენთ იმ საკულტო გამოცემებს, რომლებმაც შეცვალეს ჩვენი წარმოდგენა სტილზე, არქიტექტურასა და ინტერიერზე. კრისტიან დიორის კლასიკური რჩევებიდან ალენ დე ბოტონის ფილოსოფიურ ხედვებამდე – ეს წიგნები ნამდვილი მეგზურია მათთვის, ვისაც შთაგონებასა და პროფესიულ ცოდნა ეძებს.
The Little Dictionary of Fashion: A Guide to Dress Sense for Every Woman by Christian Dior
ეს წიგნი პრაქტიკული გზამკვლევია, რომელიც კრისტიან დიორმა 1954 წელს დაწერა. მიუხედავად იმისა, რომ ათწლეულების წინ შეიქმნა, მასში მოცემული რჩევები ელეგანტურობასა და სტილზე დღესაც აქტუალურია. დიორი ანბანის მიხედვით განმარტავს ყველაფერს – ქამრებიდან დაწყებული, საქორწილო კაბებით დამთავრებული.
Gods and kings the rise and fall of alexander mcqueen and john galliano by Dana Thomas
ეს არის მომნუსხველი დოკუმენტური პროზა მოდის ორი გენიოსის შესახებ. ავტორი აღწერს, როგორ შეცვალეს მაკ-ქუინმა და გალიანომ 90-იანი წლების მოდის ინდუსტრია და რა ფასად დაუჯდათ მათ ეს წარმატება. წიგნი კარგად აჩვენებს მოდის როგორც ბრწყინვალე, ისე ბნელ მხარეებს.
The Psychology of Fashion by Carolyn Mair
თუ გაინტერესებთ, რატომ ვიცვამთ იმას, რასაც ვიცვამთ და როგორ მოქმედებს ტანსაცმელი ჩვენს განწყობაზე, ეს წიგნი თქვენთვისაა. ის იკვლევს კავშირს ადამიანის ფსიქიკასს და ინდუსტრიას შორის, რომელიც მუდმივად ახალ ტენდენციებს გვთავაზობს.
D.V. by Diana Vreeland
დიანა ვრილანდი მოდის სამყაროს ერთ-ერთი ყველაზე გავლენიანი ფიგურა და Harper’s Bazaar-ისა და Vogue-ის ლეგენდარული რედაქტორი იყო. მისი ავტობიოგრაფია ისეთივე ექსცენტრიკული და ფერადია, როგორიც თავად ავტორი. ეს არის წიგნი სტილის შეგრძნებასა და ფანტაზიის ძალაზე.
The fashion system by Roland Barthes
ეს უფრო აკადემიური და სერიოზული ნაშრომია მათთვის, ვისაც მოდის, როგორც სიმბოლოების ენის, შესწავლა სურს. ცნობილი ფრანგი ფილოსოფოსი და სემიოტიკოსი როლან ბარტი აანალიზებს, როგორ აყალიბებს ჟურნალები და ტექსტები მოდის „ღრმა მნიშვნელობას“.
The End of Fashion: How Marketing Changed the Clothing Game Forever by Teri Agins
Wall Street Journal-ის რეპორტიორი ტერი ეიჯინსი ამ წიგნში ხსნის, როგორ გადაიქცა მოდა ხელოვნებიდან გიგანტურ ბიზნესად. ის დეტალურად აღწერს მარკეტინგის, წარმოებისა და გაყიდვების იმ მექანიზმებს, რომლებმაც შეცვალეს ჩვენი დამოკიდებულება ტანსაცმლის მიმართ.
100 Ideas that Changed Fashion by Harriet Worsley
ეს არის შესანიშნავი ილუსტრირებული გზამკვლევი, რომელიც მოდის ევოლუციის გზას უჩვენებს მკითხველს. წიგნი მიმოიხილავს გარდამტეხ მომენტებს – კორსეტზე უარის თქმიდან დაწყებული, მინი ქვედაბოლოებისა და ჯინსების ეპოქით დამთავრებული.
Chanel: Collections And Creations by Danièle Bott
„შანელის“ ბრენდი მხოლოდ „პატარა შავი კაბა“ არ არის. სწორედ ამ თეზისს ეყრდნობა ეს წიგნიც – იგი სიღრმისეულად აანალიზებს ბრენდის ხუთ მთავარ სიმბოლოს: კოსტიუმს, კამელიას, სამკაულს, მაკიჟს და სუნამოს. იდეალურია მათთვის, ვისაც მაღალი მოდის (Haute couture) დეტალები აინტერესებს.
Fashion Illustration Now by Laird Borrelli
დიზაინერისთვის ჩანახატი (ესკიზი) ფიქრის პროცესია. ამ წიგნში თავმოყრილია ისეთი ლეგენდების ჩანახატები, როგორებიც არიან: კარლ ლაგერფელდი, ივ სენ-ლორანი და ჯორჯიო არმანი. ის საუკეთესო შთაგონებაა მათთვის, ვისაც ხატვა და მოდის დიზაინის ტექნიკური მხარე იზიდავს.
The Sartorialist by Scott Schuman
სკოტ შუმანი ქუჩის მოდის ფოტოგრაფიის პიონერია. ეს წიგნი არ არის თეორიული ნამუშევარი, ის ფოტოების კრებულია, რომელიც წარმოაჩენს, როგორ იმოსებიან ადამიანები რეალურ ცხოვრებაში, ნიუ-იორკიდან პარიზამდე. ის გვასწავლის, რომ სტილი უფრო მნიშვნელოვანია, ვიდრე ბრენდი.
The Interior Design Reference & Specification Book Updated & Revised: Everything Interior Designers Need to Know Every Day by Chris Grimley and Mimi Love
ეს არის ნამდვილი „ბიბლია“ ინტერიერის დიზაინერებისთვის. წიგნი არ შემოიფარგლება მხოლოდ ლამაზი ფოტოებით, მასში ნახავთ კონკრეტულ სტანდარტებს, ზომებსა და ტექნიკურ დეტალებს: ავეჯის ერგონომიული განლაგება; მასალების შერჩევის პრინციპები; განათებისა და ელექტრობის დაგეგმარება.
Garden Design: A Book of Ideas by Heidi Howcroft and Marianne Majerus
რაც შეეხება ექსტერიერს, ეს წიგნი საუკეთესოა ლანდშაფტის დიზაინისთვის. მასში თავმოყრილია 600-ზე მეტი იდეა: ბაღის ან ტერასის დაგეგმარება; მცენარეებისა და მასალების სწორი კომბინაცია; მცირე ეზოების მაქსიმალური ათვისება.
The Architecture of Happiness by Alain de Botton
ეს არ არის ტექნიკური სახელმძღვანელო, არამედ ფილოსოფიური ნაშრომი იმაზე, თუ როგორ მოქმედებს არქიტექტურა და დიზაინი ჩვენს ბედნიერებაზე. ალენ დე ბოტონი ხსნის, რატომ მოგვწონს გარკვეული ტიპის შენობები და როგორ ცვლის გარემო ჩვენს შინაგან მდგომარეობას.
ტექსტი: თათული ღვინიანიძე
