კომპანია სოკარმა ზაფხულის სეზონთან დაკავშირებით განსხვავებული და საინტერესო პროექტი წარუდგინა აუდიტორიას. ბრენდის ახალი ინიციატივა მომხმარებლებს არა მხოლოდ სოლიდური საჩუქრების მოგების შესაძლებლობას სთავაზობს, არამედ აქცენტს თანადგომასა და ქველმოქმედებაზე აკეთებს. კამპანია, რომელიც სამი თვის განმავლობაში გაგრძელდება, უცნობი ადამიანების ერთმანეთთან დაკავშირებასა და პოზიტიური ემოციების გაცვლას ისახავს მიზნად.
კამპანიაში ჩართვა მთელი ქვეყნის მასშტაბითაა შესაძლებელი და ის სრულად ციფრულ სისტემაზეა დაფუძნებული. პროცესში მონაწილეობის მისაღებად საჭიროა კომპანიის ოფიციალური მობილური აპლიკაციის (SOCAR Geo) გადმოწერა და მასში ენერჯი ბარათის დამატება. ამის შემდეგ, ბენზინსა თუ გაზგასამართ სადგურებზე ყოველი 15 ლიტრი საწვავის ან 15 კუბური მეტრი გაზის შეძენისას, ბარათის დასკანერებით მომხმარებელი ავტომატურად იღებს გათამაშების ერთ ბილეთს. დაგროვილი ბილეთების რაოდენობა კი პირდაპირპროპორციულად ზრდის ფინალურ ეტაპზე წარმატების მიღწევის შანსს.
პროექტის მთავარი სიახლე ყოველდღიური მომენტალური პრიზებია, რომელთა მოგება ბარათის დასკანერებისთანავეა შესაძლებელი. პროექტის ფარგლებში ყოველდღიურად ასი საჩუქარი თამაშდება და ენერჯი ქულებსა და ვეიმარტის ვაუჩერებს მოიცავს. სინამდილეში, კამპანიის ყველაზე ემოციური ნაწილი სწორედ ყოველდღიურობაში ვლინდება: მოგებულ ადამიანს შეუძლია პრიზი თავად გამოიყენოს ან სრულიად უცხო პირს გაუზიაროს. თუ მომხმარებელი სხვას გადაუგზავნის საჩუქარს, კომპანია მას დამატებით 5 ბილეთს ურიცხავს. საჩუქრის მიმღებ უცნობ ადამიანს კი 1 კვირა ეძლევა იმისთვის, რომ მოულოდნელ საჩუქარს დაეთანხმოს.
კამპანია პირველ ივნისს დაიწყო, 31 აგვისტოს ჩათვლით გასტანს. პროექტის ფინალური ეტაპი კი 10 სექტემბერს, პირდაპირი ეთერის ფორმატში შედგება და 5 მთავარი გამარჯვებული გამოვლინდება. სუპერპრიზების ფონდი საკმაოდ შთამბეჭდავია. გამარჯვებულებს გადაეცემათ ახალაშენებული და დასრულებული ბინა საბურთალოზე, „თეთრი კვადრატის“ კომპლექსში, ასევე ახალი ელექტრომობილი EQ7 ან სამი ფულადი პრიზიდან ერთ-ერთი, თითოეული 10 000 ლარის ოდენობით.
სოკარში სჯერათ, რომ ეს პროექტი ყველას დაანახებს, თუ როგორ შეიძლება ერთი პატარა ჟესტი სხვისი ბედნიერებისა და დიდი გამარჯვების დასაწყისი გახდეს.
