„ნარგისის“ ისტორიაში ახალი ეტაპი დაიწყო. ჟურნალი მკითხველს N13-ის სახით სრულიად განახლებულ კონცეფციას სთავაზობს – ორენოვან, თანამედროვე ფორმატს, რომელიც საერთაშორისო სტანდარტებზეა დაფუძნებული.
უახლესი ნომრის პრეზენტაცია თბილისში, სასტუმრო Telegraph-ში გაიმართა.
სადა და ელეგანტურმა გარემომ სტუმრებს შესაძლებლობა მისცა, ახლოს გაცნობოდნენ ჟურნალის ახალ ხედვას და გაეზიარებინათ მასთან დაკავშირებული პირველადი შთაბეჭდილებები.
საღამოს ორგანიზებაზე Click Events-მა იზრუნა, მუსიკალური ატმოსფერო კი Haverdi-მ შექმნა.
ღონისძიების ფარგლებში სტუმრებს სიტყვით მიმართა N13-ის საქართველოს მთავარმა რედაქტორმა, თაკო ჩხეიძემ.
მან ისაუბრა გამოცემის ახალ მიმართულებებზე და მადლობა გადაუხადა პარტნიორებს – „სოკარს“, „ბოიგარს“ და სასტუმრო „ტელეგრაფს“, სადაც ნომრის გარეკანის ფოტოსესია გაიმართა.
საღამოს ესწრებოდნენ მოდის, კულტურისა და ბიზნესის სფეროს წარმომადგენლები, ასევე სტუმრები აზერბაიჯანიდან და N13-ის საერთაშორისო რედაქციის წევრები.
ღონისძიების განსაკუთრებული მომენტი იყო ახალი ნომრის გმირის, ბალეტის ვარსკვლავ გიორგი ფოცხიშვილის გამოჩენა.
ის ოჯახთან ერთად ესწრებოდა საღამოს, სტუმრებს გულწრფელი სიტყვით მიმართა და ჟურნალთან თანამშრომლობის გამოცდილება პირადად გაუზიარა.
N13-ის საზაფხულო წვეულება არა მხოლოდ ახალი ნომრის პრეზენტაცია, არამედ პლატფორმა გახდა, რომელიც კიდევ ერთხელ ხაზს უსვამს გამოცემის ახალ ღირებულებებს, ხედვას და საერთაშორისო მიმართულებას – ახალ ეპოქას, რომელსაც „ნარგისი“ დღეს ზუსტად და თავდაჯერებულად უძღვება.
Photo: Anna Leonizze-Kostomarova
