2025 წლის ერთ-ერთ ყველაზე განხილვად მომენტად იქცა “ეშმაკი ატარებს პრადა 2”-ის პირველი თიზერი, რომელმაც ინტერნეტსივრცეში მილიონობით ნახვა გამოსვლიდან სულ რამოდენიმე საათში დააგროვა. საინტერესოა რომელმა ასპექტმა მიიქცია თქვენი ყურადღება ყველაზე მეტად? იქნებ ენ ჰეთეუეის და მერილ სტრიპის მონატრებულმა დუეტმა? ან მირანდა პრისლის კვლავინდებურად ბრწყინვალე იმიჯმა, რომელსაც დრომ ვერაფერი დააკლო? რა თქმა უნდა, ყოველი დეტალი გამორჩეულად ემოციური იყო, თუმცა უნდა აღვნიშოთ, რომ თიზერის გამოსვლამ ყველაზე დიდი გამოხმაურება VALENTINO-ს მოდის სახლს მოუტანა. ალბათ, დაგვეთანხმებით რომ თიზერში განსაკუთრებულ ყურადღებას იქცევს VALENTINO-ს ლეგენდარული ფეხსაცმელი- “Rockstud”.
ერთი შეხედვით არაფერია განსაკუთრებული იმ ფაქტში, რომ მერილ სტრიპის პერსონაჟს აცვია Valentino, თუმცა აქ აქცენტი მხოლოდ მოდის სახლზე არ არის და ფეხსაცმელი, რომელმაც საზოგადოების გამორჩეული ინტერესი დაიმსახურა ისტორიაა რომელიც 2010 წლიდან იწყება. როდესაც მარია გრაცია კიურიმ და პიერპაოლო პიჩოლიმ ეს მოდელი წარადგინეს, ვერავინ იფიქრებდა, რომ ის ერთგვარ კულტურულ ფენომენად იქცეოდა ბრენდისთვის. პირველი გამოჩენიდან ძალიან მოკლე დროში Rockstud იქცა – ქალურობის, ინტელექტუალური სიმკაცრის და სიძლიერის სიმბოლოდ და ვის შეიძლებოდა გაეცოცხლებინა ის თუ არა მირანდა პრისლის?
გარდა იმისა, რომ ფეხსაცმლის იდეა იდეალურად ერგება პერსონაჟის ხასიათს, საყურადღებოა ფერიც – წითელი არ არის უბრალოდ დეტალი, ის მირანდა პრისლის შინაგანი ენერგიის ვიზუალური მანიფესტაციაა. ძალაუფლება, ამბიცია და შეუპოვრობა – ზუსტად ის სახასიათო კოდებია, რომლებმაც მირანდა პრისლი უნიკალურ, დაუვიწყარ პერსონაჟად აქცია. სწორედ ამიტომ Rockstud-ის წითელი ვერსია ბუნებრივად ერწყმის პერსონაჟის აურას და მკვეთრად, ხმაურიანად აცხადებს, რომ მირანდა ისევ აქაა – სწორედ იმ პირვანდელი ხასიათით, რომლითაც მაყურებელმა გაიცნო.
აქვე უნდა აღინიშნოს, რომ Valentino-სთვის 20th Century Studios-თან თანამშრომლობა და Rockstud-ის გამოჩენა არა მხოლოდ ისტორიული მოდელის დაბრუნება იყო, არამედ მარკეტინგულად სტრატეგიული ნაბიჯი. Rockstud-ები თიზერის გამოსვლამდე ოფიციალურ საიტზე ხელმისაწვდომი აღარ იყო, თუმცა ფილმის გამოჩენის შემდეგ ბრენდის სოციალური ქსელებით აქტიური პიარ კამპანია დაიწყო, ხოლო ისტორიული Rockstud-ებით შთაგონებული ახალი მოდელები უკვე ოფიციალურ საიტზე ხელმისაწვდომია.
